QORAQALPOG‘ISTON
RESPUBLIKASI PEDAGOGIK MAHORAT MARKAZI MUTAXASSISLARI V “USTOZLAR MILLIY
FORUMI”DA
Bugungi
kunda mamlakatimiz ta’lim tizimida amalga oshirilayotgan keng ko‘lamli
islohotlar pedagoglardan doimiy izlanish, o‘z ustida ishlash, zamonaviy bilim
va ko‘nikmalarni egallashni talab etmoqda. Ana shunday muhim jarayonlarda
pedagoglarning kasbiy rivojlanishi, ilg‘or tajribalarni o‘rganishi va
ta’limdagi yangiliklardan xabardor bo‘lishida “Ustozlar milliy forumi” alohida
ahamiyat kasb etmoqda.
“Sifatli
ta’lim – Yangi O‘zbekiston taraqqiyotining mustahkam poydevori” shiori ostida
tashkil etilgan V “Ustozlar milliy forumi” mamlakatimizning turli hududlaridan
kelgan ilg‘or, tashabbuskor va tajribali pedagoglarni bir maydonga jamladi.
Ushbu nufuzli anjumanda Qoraqalpog‘iston Respublikasi pedagogik mahorat markazi
metodik xizmat mutaxassislari ham faol ishtirok etdilar.
Forum
Qoraqalpog‘iston Respublikasi pedagogik mahorat markazi mutaxassislari uchun
ta’lim sohasidagi eng muhim yangiliklar, zamonaviy yondashuvlar va ilg‘or
tajribalarni o‘rganish, shuningdek, boshqa hududlardagi hamkasblar bilan o‘zaro
fikr va tajriba almashish imkonini berdi.
Forum
davomida ta’lim tizimida amalga oshirilayotgan islohotlar, yangi o‘quv yiliga
tayyorgarlik, yangi avlod darsliklarini ta’lim jarayoniga samarali joriy etish,
zamonaviy pedagogik texnologiyalardan foydalanish hamda ilg‘or ish
tajribalarini ommalashtirish kabi dolzarb masalalar keng muhokama qilindi.
Ayniqsa,
yangi avlod darsliklarining mazmun-mohiyati va ular asosida ta’lim jarayonini
samarali tashkil etish masalalari mutaxassislar e’tibor markazida bo‘ldi.
Bugungi darsliklar o‘quvchiga faqat tayyor bilimlarni yetkazish bilangina
cheklanmasdan, uning mustaqil fikrlashi, tahlil qilishi, izlanishi va hayotiy
vaziyatlarda to‘g‘ri qaror qabul qilish ko‘nikmalarini rivojlantirishga xizmat
qilishi alohida ta’kidlandi.
Forumda
zamonaviy va noan’anaviy pedagogik texnologiyalardan foydalanish, interfaol
metodlarni dars jarayoniga keng joriy etish, loyiha asosida ta’limni tashkil
etish, hamkorlikda ishlash, muammoli vaziyatlar yaratish va kompetensiyaviy
yondashuv asosida darslarni tashkil etish bo‘yicha muhim tavsiyalar berildi.
Qoraqalpog‘iston
Respublikasi pedagogik mahorat markazi mutaxassislari uchun bu tajribalar
kelgusida metodik xizmat faoliyatini yanada takomillashtirishda muhim ahamiyat
kasb etadi. Chunki metodik xizmatning asosiy vazifalaridan biri ilg‘or
tajribalarni aniqlash, o‘rganish, umumlashtirish va ularni keng pedagogik
jamoatchilik orasida ommalashtirishdan iboratdir.
Forumda
axborot-kommunikatsiya texnologiyalaridan samarali foydalanish masalasiga ham
alohida e’tibor qaratildi. Bugungi zamonaviy pedagog nafaqat o‘z fanining yetuk
mutaxassisi, balki raqamli texnologiyalar, elektron ta’lim resurslari va
multimedia vositalaridan erkin foydalana oladigan mutaxassis bo‘lishi zarurligi
ta’kidlandi.
Zamonaviy
o‘qituvchi dars jarayonida turli elektron resurslardan unumli foydalanishi,
yangi axborotlarni tezkor o‘rganishi va ularni ta’lim jarayoniga moslashtira
olishi muhimdir. Shu bois Qoraqalpog‘iston Respublikasi pedagogik mahorat
markazi mutaxassislari tomonidan pedagoglarning raqamli kompetensiyalarini
rivojlantirish, zamonaviy texnologiyalardan foydalanish bo‘yicha metodik yordam
ko‘rsatish ishlari yanada takomillashtiriladi.
Forum
dasturidan o‘rin olgan psixologik treninglar ham ishtirokchilarda katta
taassurot qoldirdi. Ushbu mashg‘ulotlar o‘zaro hamkorlik, jamoada ishlash,
samarali muloqot qilish, kasbiy faoliyatdagi turli vaziyatlarga to‘g‘ri
yondashish kabi ko‘nikmalarni rivojlantirishga xizmat qildi.
V
“Ustozlar milliy forumi”ning avvalgi yillardagi tadbirlardan ajralib turadigan
jihatlaridan biri sport musobaqalari va “Zakovat” intellektual o‘yinlarining
tashkil etilganligi bo‘ldi. Mazkur tadbirlar ishtirokchilarning nafaqat kasbiy,
balki intellektual va jismoniy salohiyatini namoyon etishiga imkon yaratdi.
Sport
musobaqalari turli hududlardan kelgan pedagoglarni yanada yaqinlashtirib, ular
o‘rtasida sog‘lom raqobat, do‘stona munosabat va jamoaviylikni mustahkamladi.
“Zakovat” intellektual o‘yinlari esa ishtirokchilarning bilim va tafakkurini
sinovdan o‘tkazib, tezkor fikrlash, hamkorlikda qaror qabul qilish va jamoa
bilan ishlash ko‘nikmalarini rivojlantirdi.
Bunday
yangicha yondashuvlar Qoraqalpog‘iston Respublikasi pedagogik mahorat markazi
mutaxassislarida katta taassurot qoldirib, ularga kasbiy faoliyatda yangicha
yondashuvlar va yangi motivatsiya berdi.
Forumning
eng muhim jihatlaridan biri unda olingan bilim va tajribalarni “kaskad” usulida
hududlarga yetkazish tizimining yo‘lga qo‘yilganligi bo‘ldi. Shu asosda
Qoraqalpog‘iston Respublikasida ham forumning hududiy bosqichlari tashkil
etilib, Toshkent shahridagi asosiy forumda ilgari surilgan g‘oyalar va
tavsiyalar pedagoglarga yetkazildi.
Qoraqalpog‘iston
Respublikasi pedagogik mahorat markazi mutaxassislari ushbu jarayonda faol
ishtirok etib, ta’lim tizimidagi islohotlar, yangi avlod darsliklari, zamonaviy
pedagogik texnologiyalar, raqamli ta’lim vositalari va ilg‘or metodikalarni
tuman va shaharlar miqyosida ommalashtirishga o‘z hissalarini qo‘shdilar.
“Kaskad”
usulida tashkil etilgan tadbirlarning asosiy maqsadi — forumda olingan bilim va
tajribalarni faqat uning bevosita ishtirokchilari doirasida qoldirmasdan,
barcha ta’lim muassasalaridagi pedagoglargacha yetkazishdan iboratdir.
Bu
borada Qoraqalpog‘iston Respublikasi pedagogik mahorat markazi mutaxassislari
muhim metodik vazifani bajarib, markaziy forumda o‘rganilgan tajribalarni
hududdagi pedagogik jamoatchilik orasida keng ommalashtirishga xizmat
qilmoqdalar.
Xulosa
qilib aytganda, V “Ustozlar milliy forumi” Qoraqalpog‘iston Respublikasi
pedagogik mahorat markazi mutaxassislari uchun yangi bilim, boy tajriba va
kasbiy rivojlanish maydoni bo‘ldi. Forum davomida o‘rganilgan ilg‘or
tajribalar, yangi avlod darsliklari bilan ishlash usullari, zamonaviy pedagogik
va axborot texnologiyalari kelgusida hududdagi pedagoglarga metodik yordam
ko‘rsatishda muhim ahamiyat kasb etadi.
Eng
muhimi, forumdan olingan bilim va tajribalar “kaskad” usulida Qoraqalpog‘iston
Respublikasining tuman va shaharlaridagi pedagoglarga yetkazilib, ta’limdagi
yangilanishlarni keng ommalashtirishga xizmat qilmoqda.
V
“Ustozlar milliy forumi” Qoraqalpog‘iston Respublikasi pedagogik mahorat
markazi mutaxassislari uchun kasbiy mahoratni oshirish, yangi tajribalarni
o‘rganish va ta’lim taraqqiyotiga munosib hissa qo‘shish yo‘lida muhim qadam bo‘ldi.
Qoraqalpog‘iston Respublikasi pedagogik
mahorat markazi o‘zbek tili fani metodisti: Utkir Matmuratov