Tájiriybeli ustaz – bilim sapasınıń kepili
Tájiriybe, izlenis hám pedagogikalıq sheberlik arqalı bilimlendiriw sapasın arttırıw
Búgingi kún bilimlendiriw sisteması pedagoglardan tek ǵana pándi sapalı úyretiw emes, al turaqlı izlenis, innovaciyalıq usıllardı ámeliyatqa engiziw hám kasiplik rawajlanıwdı talap etpekte. Áne usınday kásibine sadıq, pedagogikalıq sheberlikke iye ustazlardan biri Kegeyli rayonı mektepke shekemgi hám mektep bilimlendiriw bólimine qaraslı 8-sanlı mekteptiń qaraqalpaq tili hám ádebiyatı páni oqıtıwshısı Serjanova Nasiba Quwatbay qızı bolıp tabıladı.
Ol bilimlendiriw tarawında 10 jıl tájriybege iye, óziniń iskerliginde turaqlı túrde izleniw, oqıtıw metodikasın jetillistiriw hám oqıwshılardıń bilimlendiriw sapasın arttırıw jolında nátiyjeli miynet etip kiyatırǵan joqarı kategoriyalı pedagog. Ustazdıń kásiplik metodikası oqıwshılardı jeke rawajlandırıwǵa hám olardıń pánge bolǵan qızıǵıwshılıǵın oyatıwǵa qaratılǵan.
2025–2026-oqıw jılı: izlenis hám jetiskenlikler
Ótken 2025–2026-oqıw jılı Nasiba ustaz ushın júdá nátiyjeli hám tabıslı jıl boldı. Ol bul oqıw jılı dawamında Kásiplik rawajlanıw kúnlerinde Kegeyli rayonı filologiya baǵdarı jetekshi ustazalarına mentorlıq wazıypasın atqardı.
Mentorlıq iskerligi dawamında shólkemlestirilgen sabaqlar júdá joqarı dárjede, mazmunlı hám shólkemlesken halda ótkerildi. Bul seminar hám ámeliy sabaqlar rayon oqıtıwshıları ushın tájriybe almasıw, jańa pedagogikalıq texnologiyalardı meńgeriw hám metodikalıq sheberlikti arttırıw ushın úlken tájiriybe maydanına aylandı.
«Jıl oqıtıwshısı – 2026» kórik-tańlawındaǵı jetiskenlik
Bul shólkemlestirilgen sabaqlar hám turaqlı izlenisler Nasiba Serjanova ushın keń imkaniyatlar esigin ashtı hám óz kásiplik sheberligin jańa basqıshqa kóteriwge xızmet etti.
Ol «Jıl oqıtıwshısı – 2026» respublikalıq kórik-tańlawında belsene qatnasıp, 91 ball topladı hám tanlaw jeńimpazı boldı.
Bul kórsetkish ustazdıń metodikalıq hám pedagogikalıq tayarlıǵı joqarı dárjede ekenligin jáne bir mártebe dálilledi.
Zamanagóy texnologiyalar hám interaktiv oqıtıw
Nasiba Serjanova óz sabaqlarında zamanagóy axborot texnologiyaların hám interaktiv oqıtıw metodların ónimli qollanıp kelmekte. Ol oqıw processinde intellektual oyınlar hám sanlı tálim platformalarınan nátiyjeli paydalanıw arqalı oqıwshılardıń pikirlew qabiletlerin rawajlandırıwdı maqset etken.
Sonday-aq, ustaz jas kásipleslerine kásiplik metodikalıq járdem kórsetip, mektep hám rayon kóleminde tálim sapasın arttırıwǵa óziniń múnásip úlesin qosıp kelmekte.
Búgingi kúnge shekem birqansha metodikalıq qollanbalardıń avtorı bolıp, olardı mektep ámeliyatına tabıslı engizip kelmekte.
Oqıwshılar menen islew hám dóretiwshilik
Sonıń menen birge, ol óz oqıwshılarınıń ilimiy hám dóretiwshilik qabiletlerin arttırıwǵa úlken itibar qaratadı. Onıń basshılıǵında tayarlanǵan oqıwshılar túrli tanlawlar hám pán olimpiadalarında sıylı orınlardı iylep kelmekte.
Juwmaq
Juwmaqlap aytqanda, Nasiba Serjanovanıń tálim tarawındaǵı pidayılıǵı, turaqlı izlenisleri hám oqıwshılarǵa bolǵan mehir-muhabbatı jas áwladtı sapalı tárbiyalawda úlken úlgi boları sózsiz.
Ustazǵa keleshek kásiplik iskerliginde jáne de úlken jetiskenlikler tileymiz! 🎓🏆